நீங்கள் தேடியது "ஜெபி புயல்"

டோக்கியோ:

ஜப்பானில் மேற்கு கடற்கரை பகுதியில் ‘ஜெபி’ என பெயரிடப்பட்டுள்ள புயல் கடுமையாக தாக்கியது. இதனால் மணிக்கு 216 கி.மீ வேகத்தில் சூறாவளியுடன் கூடிய காற்று வீசியது. பலத்த மழையும் கொட்டியது.

இதன்காரணமாக மத்திய இஷிகவா, ஒசாகா, நகோயா உள்ளிட்ட 20-க்கும் மேற்பட்ட பகுதிகள் கடுமையாக பாதிக்கப்பட்டன. பலத்த காற்று காரணமாக மரங்கள், மின்கம்பங்கள் சாய்ந்தன.

மின்சாரம் துண்டிக்கப்பட்டது. இதனால் ஒரு லட்சத்துக்கும் மேற்பட்ட மக்கள் இருளில் தவித்தனர். காற்று பலமாக வீசியதால் ரோடுகளில் சென்று கொண்டிருந்த மற்றும் நிறுத்தப்பட்டிருந்த கார்கள் தலைகீழாக புரட்டி போடப்பட்டு கவிழ்ந்தன.

ஒசாகா வளைகுடாவில் பாலத்தின் மீது சென்று கொண்டிருந்த ஒரு லாரி தூக்கி வீசப்பட்டது. கயோடோ ரெயில் நிலையத்தில் மேற்கூரை சரிந்தது.


விமான நிலையத்தில் இருந்து வெளியேறும் வழியில் உள்ள பாலம் உடைந்துவிட்டது. இதனால் அங்கிருந்து 3 ஆயிரம் பயணிகள் வெளியேற முடியாமல் சிக்கி தவிக்கின்றனர். இதேபோன்று ஜப்பானில் உள்ள பல விமான நிலையங்களும் பாதிக்கப்பட்டு விமான போக்குவரத்து ரத்து செய்யப்பட்டுள்ளது.

புல்லட் ரெயில் சேவையும், பஸ் போக்குவரத்தும் நிறுத்தப்பட்டுள்ளது. கடலில் ராட்சத அலைகள் எழும்புவதால் படகு மற்றும் கப்பல் போக்குவரத்தும் நிறுத்தப்பட்டுள்ளது.

வெள்ளப்பெருக்கு அதிகரித்துள்ளதால் 25 லட்சத்துக்கும் மேற்பட்ட மக்கள் குடியிருப்புகளில் இருந்து வெளியேற்றப்பட்டு பாதுகாப்பு முகாம்களில் தங்க வைக்கப்பட்டுள்ளனர்.


பிரதமர் ஷின்சோ அபே அவசர கூட்டம் கூட்டி விரைவான மீட்பு நடவடிக்கை குறித்து ஆலோசித்தார். பொதுமக்களின் உயிரை காப்பாற்றும் நடவடிக்கையில் அதிகாரிகள் தீவிரமாக ஈடுபடும்படி அறிவுறுத்தினார்.

இதற்கிடையே புயல் மழைக்கு இதுவரை 9 பேர் பலியாகி உள்ளனர். 200 பேர் காயம் அடைந்துள்ளனர். ஜப்பானில் 25 ஆண்டுகளுக்கு பிறகு இத்தகைய கடும் புயல் தாக்கியுள்ளதாக வானிலை ஆய்வுமைய நிபுணர்கள் தெரிவித்துள்ளனர். #Japan #typhon

டோக்கியோ:

ஜப்பானின் மேற்கு பகுதியில் உள்ள இஷிகாவா பகுதியில் இன்று கடந்த 25 ஆண்டுகால வரலாறு காணாத அதிவேக ‘ஜெபி’ புயல் வீசியது. மணிக்கு 216 கிலோமீட்டர் வேகத்தில் பல பகுதிகளை துவம்சம் செய்த இந்த புயலால் பல வீடுகளின் மேற்கூரை நெடுந்தூரத்துக்கு பறந்து சென்று விழுந்தன.

பாலங்களின் மீது சென்ற வாகனங்களை தலைகுப்புற கவிழ்த்துப்போட்ட இந்த பெரும்புயல், ஓசாகா கடற்கரையில் நங்கூரம் பாய்ச்சி இருந்த எண்ணெய் கப்பலையும் நிலைகுலையச் செய்தது.

அந்த கப்பல் நகர்ந்து சென்று பாலத்தின் அடிப்பக்கத்தில் மோதியதால் இசுமிஸானோ நகரில் இருந்து கன்சாய் நகர விமான நிலையத்துக்கு செல்லும் சாலை துண்டிக்கப்பட்டுள்ளது. விமான நிலையத்துக்குள் கடல்நீர் புகுந்து ஆறுபோல் காட்சி அளிக்கிறது.

புயல் கடந்து செல்லும் பாதையில் உள்ள அனைத்து பள்ளி, கல்லூரிகளுக்கு விடுமுறை அறிவிக்கப்பட்டுள்ளது. ஓசாகா நகரில் உள்ள பிரபல படப்பிடிப்புகள் நடைபெறும் யூனிவர்சல் ஸ்டுடியோ, தொழிற்சாலைகள், கடைகள், அலுவலகங்கள் மூடப்பட்டுள்ளன.

நகோயா மற்றும் ஓசாகா நகரில் விமான நிலையங்கள் மூடப்பட்டுள்ளன. சுமார் 800 விமானச் சேவைகள் ரத்து செய்யப்பட்டுள்ளன. இதேபோல், புல்லட் ரெயில், எக்ஸ்பிரஸ் ரெயில் மற்றும் படகு போக்குவரத்தும் நிறுத்தி வைக்கப்பட்டுள்ளது. மின்சாரம் துண்டிக்கப்பட்டதால் சுமார் 10 லட்சம் வீடுகள் இருளில் மூழ்கி கிடக்கின்றன.

வீரியத்துடன் நகர்ந்துவரும் புயலால் மரத்திலான வீடுகள் மற்றும் விளக்கு கம்பங்கள் சாய்ந்து விழக்கூடும் என்பதால் ஆபத்தான பகுதிகளில் வசிக்கும் சுமார் 12 லட்சம் மக்களை பாதுகாப்பான இடங்களுக்கு செல்லுமாறு அதிகாரிகள் அறிவுறுத்தியுள்ளனர்.

மழை வெள்ளத்தால் பல இடங்களில் நிலச்சரிவும் ஏற்படும் என அஞ்சப்படுவதால் மக்கள் தங்களது உயிரை காத்துகொள்ள பாதுகாப்பான இடங்களுக்கு செல்லுமாறு ஜப்பான் பிரதமர் ஷின்சோ அபே வலியுறுத்தியுள்ளார்.

இதற்கிடையில், புயல் சார்ந்த விபத்து மற்றும் இடிபாடுகளில் சிக்கி 6 பேர் உயிரிழந்ததாகவும், 150-க்கும் அதிகமானவர்கள் காயமடைந்ததாகவும் உள்ளூர் ஊடகங்கள் செய்தி வெளியிட்டுள்ளன.